蘋果拆局：祖記贏「卡」士必炒

蘋果拆局：祖記贏「卡」士必炒

（1）何西：意甲聯賽今晚開鑼，今季雖然有AC米蘭豪購陣容大翻新，仲向祖雲達斯（圖）挖角，但係陣容骨幹唔算大變動嘅祖記，穩定性勝一籌，始終值得被睇高一線，首戰主場迎戰卡利亞里大勝冇問題。
英超方面，上星期首輪聯賽最搶鏡嘅非曼聯莫屬，主場大勝韋斯咸一仗盡情發揮進攻慾望，拉舒福特同埋新兵盧卡古等一班進攻球員個個想入波，今場作客史雲斯唔難再開入球「大」，穩陣揀個[2.5球]「大」。
（2）盧卡東尼：奧巴美揚弗爆撐蜜蜂
今日重心係德甲嘅多蒙特，奧巴美揚喺上周盃賽先入三球，證明有態，作客禾堡，讓半/一已經算少，德甲過關中仲有漢諾威呢支升班馬，博同緬恩斯鬥「大」；英超方面，阿仙奴作客只讓史篤城半/一，上盤梗係要得過喇！
（3）咖喱：馬體會食老本吼小勝
西甲開鑼，馬體會冇得買人，焗用上季嘅陣容。睇馬體會上季作客成日攻唔入對手，贏波都係小勝多。雖然唔太清楚基羅納有乜來頭，但第一次升上西甲，喺主場球迷面前，相信士氣特別高昂，應該可以頂住馬體會，唔使大敗。
（4）守丹：紅軍有前冇後「大」硬
英超開季，好多前列球隊未現真身，不過肯定嘅係利物浦真係幾好火，上場冇出古天奴一樣攻得入三球，今場返主場對首輪被大炒嘅水晶宮，入兩、三球係基本啦，記住，紅軍前面勁但防線好屎，失兩、三球都唔奇，所以捧「大」！
（5）筋肉人：華迪努力唔會「白」費
李城上場作客阿仙奴臨尾被反勝，全失三分好唔抵，射手華迪首仗交出兩入球，狀態冇問題，今場回師主場鬥升班馬白禮頓，可要上盤。白禮頓上仗對曼城頂到半場已交到功課，不過踢法高Q大棍，想贏李城，有啲難。
（6）仙道彬：撐利物浦上盤等收錢
在雙「紅」間抉擇，同是讓一球/球半，最後還是要利物浦。始終主場出擊可靠，加上水晶宮開季已不如預期，今仗又缺少韋費特沙夏，難以逞強。上盤必捧，3:1、4:1這兩個有失波波膽亦值得一試。
（7）牽牛：摩佬造勢繼續追「魔」
寧買當頭起，曼聯揭幕戰已經大勝，而且仲好似只用五、六成力，今季真係深不可測，喺歐聯未展開之前，摩連奴亦勢必盡量搶分，對手史雲斯失中場大將基菲爾施古臣，實力進一步削弱。
黑腳心聲：轉攻日聯博早收錢
（8）吾中：呢期擂台表現持續不振，今日一於將心水嘅日聯推介拆做兩條飛，首先嚟個單頭，取攻強守弱嘅浦和紅鑽迎戰FC東京開「大」，希望可以保本之餘亦嗱嗱聲收咗錢先，之後再嚟一條「讓球」3串4，以今季作客有保證嘅柏雷素爾平手盤，過兩場英超主隊上盤，捧李城主場可以擊敗升班馬白禮頓，同埋信一向靠主場搶分嘅般尼茅夫可以喺屈福特身上全取三分，如果全中嘅話，就可以一舉翻身。