趕住同球迷開P祝捷 曼城速戰速決捧半W_東方日報
特别贴士
2023-05-21 17:57:23
狀態巔峰嘅曼城直指3冠王，今輪迎戰車路士，喺主場球迷面前贏波開捧盃派對，戰意毋庸置疑。曼城挾英超11連勝氣勢，啱啱又殺入歐聯決賽，必定乘勝追擊，佢哋近6仗主場有5次半場領先，今仗又係曼城主場謝幕戰，當然要由頭贏到尾，半場主勝抵玩。（Now 621及611周日晚11時直播）
隨住爭標對手阿仙奴連場失分，喺聯賽已經11連勝嘅曼城，冠軍已成囊中之物。曼城周中喺歐聯4強大炒皇家馬德里4蛋，強勢殺入歐聯決賽，加上英足盃同曼聯爭霸，為3冠王必定搏到盡，領隊哥迪奧拿賽前亦講明要盡早捧盃，備戰之後兩場決賽，球員唔會錫力。再者，今仗係曼城今季最後一場主場賽事，絕對係開捧盃派對嘅最佳時機，球員當然想踢出最好嘅表現，由頭贏到尾咁捧盃嚟完美謝幕。
車路士球員戰意成疑
車路士今季成績低迷，夏天將會面臨大換血，看守領隊林柏特亦會離開，眾將喺前途未明情況之下，依家正處於「等收咧」狀態，戰意成疑。事實上就算近年表現「正常」嘅車路士，面對住曼城都絕對下風，兩隊近5次交手，曼城全部贏波，一於速戰速決捧曼城半場勝。
