黑山搶分頂住波斯尼亞|東方日報
特别贴士
2022-09-23 22:00:36
歐國聯B3組榜首大戰，波斯尼亞主場火併黑山。波斯尼亞進攻仍好倚賴兩老迪斯高及比真歷，好難場場都搏盡，黑山近5仗僅1敗不容忽視，加上兩軍碰頭例打和，黑山受讓必捧讓球客勝。
（周六凌晨2時45分開賽）
波斯尼亞雖然位居B3組榜首，睇落唔錯，但頭4輪只得2勝2和，表現唔算標青。單睇數據，波斯尼亞今次大軍名單中，只有兩個入球數字達雙位數，就係加埋出場逾200仗、36歲箭頭迪斯高同32歲中場比真歷，以今屆歐國聯為例，波軍共入6球，兩老便佔咗一半，好難苛求佢哋場場交到貨，就算另一前鋒彼利夫積克逐漸冒起，不過水準欠穩，仍未能擔大旗。
近3次交手全部打和
另一邊廂，黑山各項賽事近5仗獲3勝1和僅1敗，包括頭4輪歐國聯錄得2勝1和1負，只落後波斯尼亞1分，爭首名博升班仲未絕望。儘管隊長祖維迪無復當年勇，好彩另一前鋒史提芬穆高沙挺身而出，今屆歐國聯4仗入4球，包括上輪贏羅馬尼亞3比0大演帽子戲法，不容小覷。
翻查紀錄，雙方近3次交手全部打和，可見黑山對親波斯尼亞分外有計，仲有得受讓咁筍，讓球客勝咪錯過。
